Duke pasur parasysh se keni bashkëpunuar edhe në projekte të tjera me regjisorin, kur ishte momenti kur ju u ftuat të ishit pjesë e roli të Rexhës në këtë projekt?

• Në këtë profesion, energjia dhe besimi janë shumë të rëndësishme. Kjo na shoqëruar ne në të gjitha projektet me regjisorin Iber Deari, ashtu si ka ndodhur edhe me Redjon. Energjia dhe besimi e kanë shtyrë regjisorin të më ftonte për të qenë pjesë e rolit Redjo, nëse më kujtohet, 1 muaj para xhirimeve. Edhe sot, jemi shumë të lumtur që gjithçka funksionon mrekullisht.

A ishte më shumë gëzim që e fituat këtë rol, apo një përgjegjësi?

• Gëzimi i madh zgjati ndoshta një ditë, deri sa mora skenarin në mail nga produksioni. Pas leximit të skenarit, fillova të bëhesha i sinqertë me veten duke u përballur me frikën. Duke njohur natyrën e punës sime profesionale me Iber Dearin, dhe duke parë kërkesat e regjisorit që kishte ardhur me një koncept shumë interesant por edhe të vështirë, pa asnjë dyshim, gjithçka që më vinin në mendje ishte vetëm PËRGJEGJËSIA.

Çfarë ju bë të vendosni të merrnit pjesë në këtë projekt? Cilat ishin aspektet e skenarit apo të regjisë që ju bënë të interesuar për rolin?

• Është një nder i madh të të besojnë njerëzit, artistët, profesionistët. Të të besojë regjisori një rol aq të rëndësishëm të ëndrrës së tij, që atë ëndërr (rol) e ka parë për vite të tëra dhe është bërë pjesë me të deri sa e ka ndërtuar, sinqerisht ndihem me fat. Sigurisht që mua më shtyri të bëhem pjesë i këtij filmi duke filluar nga skenari, pastaj koncepti dhe puna duke e njohur regjisorin. Por pse edhe jo një dëshirë për ta sfiduar veten me një projekt kaq serioz.

Si ishte procesi i gjetjes për rolin e Rexhes në “Everybody Calls Redjo”? Çfarë aspekti të veçantë ju bëri të jeni tërhequr nga ky personazh? Dhe na trego procesin e rolit?

• Nuk është se kemi kërkuar shumë larg për ta gjetur Rexhon, ishte në skenar. Por për realizimin e tij në realitet, më ka thyer brinjët. Në shikim të parë duket i thjeshtë, por në realitet ka qenë një mal me borë si proces. Për tu ngjitur në majën e atij mali ka qenë një rrugë e gjatë dhe me gropa, por me angazhim të madh, besoj që kemi arritur të ndërtojmë diçka shumë të bukur bashkë me regjisorin dhe kolegët. Para se të filloja xhirimet kam pasur një letër me plot kërkesa të regjisorit që është dashur kohë më parë unë të punoj në jetën reale me punë ashtu njejte sikur se si punon Rexho tek filmi.

Cili është mesazhi kryesor që mendoni se personazhi i Rexhes dëshiron të transmetojë tek shikuesit?

• Familja numër 1, ky mendoj se është mesazhi kryesor që Rexho si personazh mundohet të sjellë tek shikuesit. Një premtim që i bëri djalit dhe pastaj gruas e shtyn nëpër shumë vështërsi për ta mbajtur atë fjalë, dhe kjo e bën akoma më përkushtuar, më të mirë dhe më të dashur për shikuesit. Durimi dhe mirësjellja janë edhe dy tipare shumë të rëndësishme që ky personazh mundohet të përcjellë si mesazh.

A ka pasur ndonjë moment specifik në film që ka qenë sfidues për ju në interpretimin e rolit dhe si keni arritur të kapni thelbin e tij?

• Kujtoj që një moment i sikletshëm ka qenë kur pesova një lëndim në fytyrë gjatë xhirimit, dhe më kap panik për një moment që mos na ndalte vrullin e punës, por me ndihmën e produksionit kaloi gjithçka shpejt. Sinqerisht, është punuar shumë mes meje dhe regjisorit për atë rol para se të futeshim në xhirim, kështu që nuk kemi lënë asnjë derë hapur për të futur ndonjë moment sfidues dhe të na kapte në befasira.

Rexha shfaqet në shumë skena të ndryshme dhe situata të filmit. Cili ishte momenti më i vështirë për ju dhe si arritët të shfaqni emocionet dhe reagimet e tij?

• E kam thënë disa herë që do më duhen 10 vite kohë për të përgjigjur kësaj pyetjeje. Kam mësuar shumë, jam sfiduar shumë, por më duhet sinqerisht kohë të mbledh fjalët e duhura për të përshkruar këtë përvojë. Është e pashmangshme që ky rol gjen një vend shumë të veçantë në jetën time dhe padyshim që më ka hapur dyert e imagjinatës se si punohet një rol kaq të rëndësishëm në një film. Do të ketë ndikim patjetër në vazhdimin e karrierës sime si aktor.

Si mendoni se roli i Rexhes në “Everybody Calls Redjo” do të ndikojë tek audiencës?

• Uroj sinqerisht që të ketë ndikim në audiencë, por edhe besoj se ka të bëjë me një film të realizuar dhe menduar në çdo detaj. Tema aktuale e filmit, njerëzorja e personazhit kryesor, ambienti dhe të gjitha rolet e tjera të filmit, besoj se do të kenë një ndikim pozitiv tek shikuesit dhe ata do të lidhen me këto personazhe.

Përshkruani një moment apo skenë të veçantë nga filmi që mendoni se do të mbetet e paharrueshme për shikuesit. Çfarë emocionesh apo mesazhesh transmeton ky moment?

Ju si aktor, a vazhdoni ende të mbani personazhin e Rexhës brenda jush, apo e keni larguar atë nga vetja?

• E kam larguar më në fund, besoj, por më ka përcjellë për shumë kohë brenda meje. Ka qenë shumë punë e madhe për tu futur në të, prandaj edhe pas përfundimit të xhirimeve ka qenë punë e madhe për tu distancuar nga gjithë ato informata dhe emocione që më ka mbushur ky rol.

Çfarë prisni pas premierës së filmit, a keni emocione?

• Pas një pune kaq të madhe, sigurisht që pritjet janë shumë të mëdha. Uroj që kësaj radhe të kemi edhe pak fat dhe ta shijojmë premierën në ndonjë festival prestigjioz ndërkombëtar, dhe pastaj me kënaqësi pres të kthehemi te bashkëkombasit tanë në krejt Ballkanin dhe ta shijojmë këtë vepër arti fantastike.