Çfarë ju tërhoqi që të jeni pjesë e filmit, një skenar i mirë apo një koncept i interesant?

• Një film i mirë fillon me një skenar të mirë. Hera e parë që lexova skenarin, më la përshtypje të mira dhe isha shumë i entuziazmuar për të filluar xhirimet. Dëshira për të punuar në filma me këtë koncept dhe ide interesante, së bashku me lirinë për të sfiduar veten, ishin arsyet kryesore për pjesëmarrjen time.

Si skenograf, cila pjesë ishte më e vështirë, përcaktimi i tonit të filmit apo realizimi?

• Pasi lexova skenarin, fillova të mendoj për skenografinë dhe nëse mund të realizohej. Sfidën më të madhe e pata në të menduarit dhe planifikimin e skenografisë dhe rekvizitave. Realizimi nuk ishte më i lehtë; kërkonte sigurimin e gjithçkaje që nevojitej dhe ishte paraparë, gjithashtu kërkonte vëmendje të vazhdueshme në detaje si rehatia e aktorëve dhe adaptimi i skenografisë sipas nevojave të skenës.

Cilat janë detajet apo objektet skenografike që ju mendoni se përcaktojnë më së miri karakterin e Redjo dhe botën në të cilën ai jeton?

• Bota e Redjos është thelbësore në film. Skenografia dhe rekvizitat e tij, veçanërisht vetura e tij e mbushur me pajisje pune, pija e tij e preferuar GAGA, televizori, radioja dhe kantat e djathit, janë elementë që ndihmojnë në karakterizimin e tij dhe në krijimin e botës në të cilën ai jeton.

A mund të ndash disa nga momentet më të vështira që ke hasur gjatë xhirimit?

• Sfida ka qenë pjesë e procesit, veçanërisht kur kemi pasur nevojë për fishekzjarre jashtë orarit të zakonshëm të punës dhe kur është ndryshuar lokacioni papritur. Gjithashtu, duhet të jesh i përgatitur për sfida të reja që mund të shfaqen gjatë rrugës.

Si bashkëpunuat me regjisorin dhe ekipin e produksionit?

• Bashkëpunimi me regjisorin dhe ekipin ka qenë i shkëlqyer. Kemi pasur një marrëdhënie të ngushtë pune me regjisorin, ku kemi diskutuar dhe analizuar çdo aspekt të filmit. Kjo marrëdhënie e ngushtë dhe e hapur ka ndihmuar në lehtësimin e procesit të punës.

A keni përdorur ndonjë temë vizuale apo simbolikë në skenografi për të theksuar mesazhet apo temat specifike të filmit?

• Po, ka shumë simbolika të krijuara përmes skenografisë, të cilat do të diskutohen më thellësisht pas premierës së filmit. Çdo element në skenë është i menduar dhe nuk është i rastësishëm.

A keni përdorur ndonjë teknologji të re apo ndonjë inovacion në fushën e skenografisë që ka kontribuar në cilësinë e përgjithshme të filmit?

• Nuk kemi pasur nevojë të madhe për teknologji të reja, përveç përdorimit të disa aplikacioneve për dizajnimin në fazat e parapërgatitjes dhe fotografimin 3D.

Cilat janë momentet më të rëndësishme nga pikëpamja skenografike që mendoni se do të lënë përshtypje të thella tek shikuesit?

• Shtëpia dhe mjediset e përditshme të Rexhos, si brendësia ashtu edhe pjesa e jashtme, dhe rregullimi i kafesë së Miftarit do të lënë përshtypje të thella tek shikuesit për shkak të detajeve të hollësishme dhe ndikimit të tyre në atmosferën e filmit.

Ju si skenograf, çfarë pritshmërie keni për filmin?

• Jam shumë optimist për suksesin e filmit. Ky projekt ka qenë i veçantë për mua; ndihet që është një film i qartë dhe i kuptueshëm që nga versioni i parë që kam parë. Besoj fort se edhe publiku do ta pëlqejë shumë.