Si u përfshite në projektin e filmit “Everybody Calls Redjo”? Çfarë ju bëri të vendosni të merrnit pjesë në këtë projekt si editor?

• Pasi që kemi punuar më parë bashkë në disa filma të shkurtër me regjisorin Ibër Dearin, gradualisht kemi ndërtuar një gjuhë të përbashkët gjatë viteve dhe jemi në një frekuencë kur vjen puna tek montazhi i filmave. Kur bëhet fjala për filmin “Everybody Calls Redjo”, isha gjithashtu i përfshirë gjatë fazës së paraprodhimit të projektit dhe e gjitha kjo e bëri që të më ofrohet mundësia dhe privilegji që ta kryej unë montazhin e filmit. Arsyja që më bëri të marrë këtë projekt për sipër pa u menduar dhe pa hezituar është përvoja nga projektet më herët dhe besimi tek regjisori Ibër.

Cilat ishin sfidat kryesore gjatë procesit të montazhit? A patët ndonjë moment të veçantë që ju kujtohet si një sfidë të rëndësishme?

• Në draftin e parë të montazhit kishim një version të filmit gati 5 orë, dhe sfida e parë ishte të mbërrinim në një version të filmit që është së paku 3 orë. Mandej sfida tjetër ishte si të bënim këtë version që kishim 3 orë të bëhej akoma më dinamik dhe të mbërrinte në 2 orë film duke rritur emocionin e filmit dhe duke mbajtur interesin e publikut paralelisht.

Si keni bashkëpunuar me regjisorin dhe pjesën tjetër të ekipit?

• Sa i përket bashkëpunimit me regjisorin, përveç draftit të parë të filmit, gjatë gjithë pjesës tjetër kemi punuar bashkë tërë kohën. Sa i përket pjesës tjetër, të vetmit me të cilët kam pasur bashkëpunim në ‘post-production’ është departamenti i ‘sound design’ dhe ‘sound mixing’, të cilat i ka kryer Darko Spasovski, me të cilin kemi pasur komunikim shumë të mirë. Dhe pjesa tjetër ‘color correction’ dhe ‘color grading’ që ka kryer Vlatko bashkë me drejtorin e fotografisë Darion, që kanë bërë magji në punën e tyre. Dhe sa i përket VFX, kemi pasur Rehanin që ka bërë punë të përkryer dhe na ka shpëtuar disa skena që kanë pasur nevojë për VFX.

A keni përdorur ndonjë teknikë të veçantë montazhi për këtë film?

• Teknika e veçantë që është përdorur në film është struktura jo lineare e tij. Gjatë tërë filmit ka skena të montuara ndryshe nga njëra-tjetra dhe të gjitha skenat kanë nga një element që i bën të veçanta.

Cili ishte një nga momentet më sfiduese për t’u montuar dhe pse?

• Përfundimi i filmit ka qenë më i vështiri, pasi i gjithë kulminacioni i emocioneve duhet të rritet dhe të përfundojë aty. Posaçërisht pjesa e filmit tek ‘Kafja e Miftarit’ është dashur të punohet shumë sepse kemi ndryshuar shumë nga skenari dhe nga ajo që është xhiruar për t’i dhënë një kahje tjetër emocioneve të Rexhës.

Sa kohë zgjat zakonisht procesi i montazhit të një filmi të gjatë si “Everybody Calls Redjo”?

• Drafti i parë ‘Rough Cut’ zgjati 1 muaj. Versioni i parë i filmit që e kemi punuar me regjisorin Ibër, zgjati 2 muaj. Por i gjithë procesi pas versionit të parë deri në versionin final, pasi e kemi ri-edituar filmin disa herë, ka zgjatur 1 vit të plotë.

Cilat janë skenat më të rëndësishme dhe të vështira për t’u montuar në këtë film?

• Siç e përmenda më herët, përfundimi i filmit ka qenë një ndër skenat më të rëndësishme të filmit dhe prandaj ka pasur sfidën dhe përkushtimin më të madh.

A kishte nevojë për reshoots apo përmirësime të skenave pasi u bë montazhi i parë?

• Fatmirësisht nuk ka pasur nevojë për reshoots pasi disa pjesë i kemi shpëtuar në montazh dhe disa skena me gabime teknike me VFX.

Sa lloje draftesh përfshin procesi i montazhit dhe si ndryshojnë ato nga njëra-tjetra?

• Kryesisht kemi tre lloje të drafteve: assembly, rough cut, dhe fine cut. Në draftin e parë apo ‘Assembly’ kemi pasur 5 orë material. Drafti i dytë, Rough Cut, ka pasur rreth 20 versione (ku çdo version e kemi emërtuar me një person nga ekipi për ta dalluar më lehtë). Versioni që ka vazhduar në Fine Cut ka qenë versioni ‘Afrim Muçaj’ nga protagonisti kryesor i filmit. Dhe drafti i tretë, Fine Cut, gjithashtu ka pasur rreth 12 versione, për çdo muaj ka një version të ri.