Si u lindi ideja për filmin “Everybody Calls Redjo” dhe çfarë ju inspirua të krijojë këtë projekt?

• Me bashkëskenaristin tim, Artin Selmani, që krijuam këtë film, ishim në kërkim të ngjarjeve dhe temave aktuale që na rrethojnë. Unë kisha një pjesë, ai një pjesë tjetër, dhe pastaj i bashkuam, kështu lindi… si një ide fillestare, e pastaj zhvillimi ka marrë shumë kohë.

Filmi “Everybody Calls Redjo” është filmi i parë i gjatë për ju. Si ndihesh për këtë sfidë dhe si arritët të përballesh me të gjitha aspektet e procesit të prodhimit?

• Shumë i emocionuar dhe i lumtur me sfidën që kam përballuar, por ka qenë shumë e vështirë. Një luftë e madhe duke i bindur njerëzit dhe vetveten se nuk duhet të dorëzohesh. Momentin që kam filluar të xhiroj filmin, e gjithë njohuria ose dija që kam pas për filmberje më është fshirë, dhe është dashur nga fillimi gjithçka më u përball vetëm. Ti ke njerëz që të ndihmojnë, një ekip të madh profesionistësh, por ajo që të bën ty të përjetosh sfidë dhe stres është sepse ti je ai që duhet ti merr vendimet për gjithçka. Është një titull shumë i rëndë që duhet të jesh gjatë tërë kohës me energji dhe aktiv me zgjidhje probleme. Më duket se gjatë gjithë xhirimit vetëm jam munduar të zgjidh probleme. Ndoshta kjo është regjia, zgjidhje problemesh.

Çfarë sfidash hasët gjatë regjizimit të një filmi të gjatë dhe si i kapërceni ato?

• Nuk ka film pa sfida, si të realizosh film në Maqedoni ashtu si në Hollywood, vetë natyra e filmit është sfidë. Sigurisht që edhe unë kam pasur shumë sfida, duke përfshirë menaxhimin e ekipit, zgjedhjen e aktorëve, dhe organizimin. Pastaj, tek ne kemi edhe problemet e motit: shiu, dielli, era. Ne sapo u bëmë gati të xhirojmë në muajin maj, buxheti i filmit na u vonua dhe u detyruam ta shtyjmë për qershor. Kur u bëmë gati në qershor, filloi sezoni i dasmave, ku ishte e pamundur të xhirosh gjatë asaj periudhe. Kështu që u detyruam të prisnim deri në muajin gusht, kur të gjithë mergimtarët kthehen në vend dhe dasmat përfundojnë.

Si ishte raporti me producentin dhe produksionin?

• Unë isha me fat që për producent e kisha profesorin tim Sasho Pavlovski, dhe ai e ka njohur natyrën time që kur isha student. Sa i përket punës me Sashon, unë kam qenë shumë i lumtur, pasi kam pasur lirinë time absolute si një artist, të bëj ndryshime, improvizime, dhe të vendos për çdo gjë artistike që kam pasur dëshirë. Producenti im më ka dhënë vetëm përkrahje maksimale, dhe kjo më ka ndihmuar shumë. Nëse ka pasur ndonjëherë ndonjë mendim se diçka duhet të ndryshohet në skenar apo ekip, asnjëherë nuk ka insistuar, vetëm më ka thënë: ‘Ti vendos, ti je regjisor.’ Por mendoj që kjo pjesë është e tepërt. Për mua, një nga këshillat më të mira që më ka dhënë gjatë krijimit të filmit tonë është se filmi nuk ka formulë. Nëse do kishte ndonjë formulë, unë çdo vit do bëja filma dhe do isha në festivale e deri në Oscars. Kështu që dëgjo zemrën tënde. Jam mirënjohës për mundin, dashurinë, dhe bashkëpunimin e producentit, njëkohësisht profesorit tim, Sasho Pavlovski.

Si ka qenë bashkëpunimi me aktorët?

• Bashkëpunimi me aktorët ka qenë fantastik, edhe pse procesi i kastingut ka qenë shumë i gjatë dhe i vështirë, por me aktorët kam kaluar shumë mirë. Unë i dua aktorët, dhe ato janë pjesa më e rëndësishme në film. Disa prej tyre i kisha miq, disa prej tyre për herë të parë kam punuar, por me të gjithë shumë mirë. Afrim Mucaj dhe Adriana Matoshi kanë bërë shumë për këtë skenar, dhe jam shumë i lumtur që më kanë ndihmuar shumë për të vizualizuar këtë histori. Thjeshtë më duket kam pasur fat që këto dy kanë qenë në rolet kryesore. Një kombinim perfekt. Jemi kënaqur duke i xhiruar skenat. Ledioni, mund të them një fëmijë tepër i talentuar, që e ardhmja e tij do jetë e ndritur në fushën e aktrimit, një fëmijë punëtor dhe shumë i talentuar. Gjithashtu, me Adem Karagen kam punuar edhe në filma të tjerë, por edhe në këtë film ka qenë kënaqësi ta kem në xhirime, ka bërë një rol shumë të mirë. Mirsad Abazi dhe Adrian Aziri kanë qenë një super energji e mirë dhe kanë bërë role shumë të veçanta. Një aktore që do jetë me një performancë unike është Bereda Rashit; për publikun shqiptar, ai paraqitet në film për herë të parë dhe ka bërë një rol shumë të mirë. Aktorët e tjerë janë të shkëlqyer, si Bujar Ahmeti, Labinot Raci, Daniela Markaj, Muzafer Etemi, Nehat Mehmeti, Valon Nuhiu, Blerim Ismani. Pra, ekipi i aktorëve do të bindeni edhe vetë se kanë bërë performancë shkëlqyer.

Si ka qenë bashkëpunimi me ekipin tjetër të filmit gjatë procesit të prodhimit?

• E gjitha ekipa ka qenë fantastike, unë kam qenë i hapur të bashkëpunoj me të gjithë. Sigurisht, nëse duhet të flasim për më të rëndësishmit, ka qenë Drejtori i Fotografisë Dario Sekulovski, një njeri i shkëlqyeshëm, një artist që nuk ka ditur çfarë është lodhja dhe nuk ka pasur kurrë në fjalorin e tij fjalën JO. Që nga para-përgatitja kemi punuar shumë, dhe ai ka qenë çdo herë aktiv, një drejtor fotografie që mendoj se çdo regjisor do të donte të punonte. Diskutime të shumta kreative kam pasur edhe me mjeshtrin e tonit, që njëkohësisht bën edhe muzikën e filmit, Darko Spasvski Packi. Që nga fillimi kemi bashkëbiseduar edhe për pjesë kreative dhe ai më ka ndihmuar shumë me zgjidhje. Pastaj, për pjesën e post-produksionit, duke u marrë me muzikën, ai vërtet ka bërë një punë të shkëlqyer. Pra, bashkëpunimi me të ka qenë fantastik. Një njeri shumë i veçantë është montazheri i filmit, Avdi Thachi, me të cilin kemi bashkëpunuar edhe më herët, por kësaj radhe po bëjmë filmin e metrazhit të gjatë. Pra, po kalojnë gati 2 vite në post-produksion dhe i vetmi njeri që jemi 24 orë në kontakt që flet, mendon dhe mediton gjithçka për filmin është montazheri Avdi Thachi. Kemi pasur një proces shumë të gjatë, por shumë të mirë. Avdi, si montazher, nuk ka lënë version ose metodë pa përdorur dhe provuar gjatë filmit. Nga një minutazh prej 5 orësh, ka arritur ta sjellë në formë të plotë në forma të ndryshme deri në 2 orë. Jam shumë i lumtur që kemi krijuar këtë film bashkarisht. Ai është një djalë shumë i talentuar, i përkushtuar në punën deri në maksimum dhe një artist i vërtetë. Nëse flasim për xhirimet, unë kam pasur një punë fantastike edhe me skenografët e filmit, Ardian Kadriun, i cili ka punuar vazhdimisht dhe shumë kreativisht në krijimin e skenografisë dhe pjesës tjetër që ka në skenografi. Është një djalë shumë punëtor dhe kreativ. Jam shumë mirënjohës edhe për kostumografen e filmit, Zaklina Krstevska, e cila ka një bagazh të madh të filmave dhe gjithashtu ka krijuar kostume fantastike për personazhet. Asistenti im i parë, Andrej, pastaj script supervisor ose krahut i djathtë im, Alicia Ferro, kanë qenë fantastik dhe shumë bashkëpunues. Gjithashtu, e gjithë ekipa nga ndriçuesit, pjesa e producentëve duke përfshirë dhe punën e palodhur të Line Producentit Ilija Ciriviri, bashkë me ekipin e tij, të gjithë janë munduar dhe kanë dhënë maksimumin për të realizuar këtë film. Unë mendoj se kam pasur fat dhe jam i lumtur për bashkëpunimin.

Cilat janë elementët e filmit që mendoni se bëjnë këtë projekt të dallueshëm nga të tjerët në kategorinë e tij?

• Ajo që mendoj se e bën të dallueshëm është tema aktuale dhe autenticiteti, ose origjinaliteti, që jam munduar të mbaj gjatë tërë kohës. Në këtë film ndodhin ngjarje që vazhdimisht si regjisor, por edhe të tjerët, i hasim në rrugën tonë, në kohën që po jetojmë. Pastaj, ky film ka përzierje zhanrash. Fillon si komedi, por nuk përfundon si e tillë. Unë mund të flas edhe më shumë për stilin e filmit dhe për kamerën, por më mirë do ta lë një kritik në të ardhmen që, pasi të shohë filmin, të përcaktojë dhe vlerësojë se çfarë e bën më të veçantë.

Duke qenë se ky është filmi i parë i gjatë për ju, cilat janë mësimet më të rëndësishme që keni nxjerrë nga kjo eksperiencë?

• Gjej temën ose tregimin që të flasin ty në zemër, puno shumë në skenar, bëj sa më shumë parapërgatitje, bëj pastaj më shumë përgatitje, provo shumë dhe xhiro edhe më shumë. Beso në vetvete dhe beso në profesionistët e tjerë të filmit, por asnjëherë mos i beso dikujt që nuk ka pas vetes asgjë të suksesshme.

Si do ta përshkruani muzikën dhe montazhin e filmit dhe si këto elementë kontribuuan në atmosferën dhe imazhin përfundimtar të projektit?

• Nëse duhet të përgjigjem në më pak fjalë për këtë pyetje, mendoj se ky film ka arritur të krijojë një montazh shumë të guximshëm dhe unik nga Avdi Thachi, dhe gjithashtu, muzika është një nga muzikat më të veçanta që ka krijuar në film kompozitori Darko Spasvski. Ju do ta shikoni vetë filmin dhe do të bindeni.

Pas realizimit të filmit, çfarë mesazhi do të donit të lini për artistët e rinj dhe krijuesit që duan të hyjnë në botën e kinematografisë?