Si ishte momenti kur zbuluat se ka casting për film dhe po kërkohen fëmijë për rolin e Nikut?
Kam marrë pjesë në disa projekte më të vogla, dhe nga një të afërm familjar mësova për kërkimin e një roli në filmin Everybody Calls Rexho. Mendova se mund të përfaqësoj mirë personazhin e Nikut.

Si ishte dita kur shkuat në kasting?
Fillimisht ndjeva disa emocione, por më pas, bashkë me aktorët e tjerë, krijuam një marrëdhënie pothuajse familjare, dhe gjithçka shkoi mirë.

A besuat se do të ishit pjesë e filmit?
Po, besoja fuqishëm sepse karakteristikat e Nikut ishin shumë të ngjashme me të mijat.

Si ishte dita e parë në xhirime?
Dita e parë solli stres por edhe lumturi dhe krenari. Ishte emocionuese të fillonim xhirimet, dhe sapo kamera filloi të regjistrojë, unë transformohesha nga Ledioni në Nikun.

Çka ju ka pëlqyer më shumë për të luajtur rolin e Nikut?
Më pëlqente kurioziteti, thjeshtësia dhe dashuria e Nikut për prindërit e tij.

Çfarë ju ka pëlqyer më shumë gjatë kohës së xhirimeve të “Everybody Calls Rexho”?
Atmosfera ishte fantastike, veçanërisht momentet e gabimeve ku kishte shumë të qeshura dhe energji pozitive. Ndihesha si pjesë e një familjeje të madhe.

Cili ishte momenti juaj më i vështirë dhe stresues në film?
Çdo fillim ishte sfidues, duke përfshirë kastingun dhe ditët e para të xhirimeve, por me kalimin e kohës ndjeva se ishim një familje.

Cila ishte skena më e vështirë?
Skenat me dialog ishin sfiduese, veçanërisht një skenë 6-minutëshe ku në disa momente duhej të improvizoj.

Si kaluat kohën me aktorët e tjerë jashtë skenave?
Kalimi i kohës me aktorët e tjerë ishte fantastik; ndiheshim si një familje e vërtetë.

A ka ndonjë skenë të filmuar që ju ka bërë më të lumtur dhe pse?
Skena në pishinën improvizuese ishte shumë e veçantë, si dhe skenat e festës së ditëlindjes dhe udhëtimeve me makinë.

A ka ndonjë gjë të veçantë që keni mësuar gjatë kësaj përvoje filmimi?
Kjo përvojë më mësoi procesin e realizimit të një filmi dhe sfidat që vijnë me të.

Çfarë është gjëja më e këndshme që keni zbuluar për karakterin e Nikut?
Zbulova lojrat e tij me tablet, udhëtimet me makinë me babain dhe bisedat e tyre të ngrohta.

A do të vazhdoni ëndrrën tuaj në rrugën e aktorit?
Patjetër, jam takuar me objektivin e kamerës që në moshë të re dhe është një nga pasionet që dua ta kthej në profesion.