Si u angazhuat për rolin e Destanit në filmin “Everybody Calls Redjo”? Çfarë tërheqje personale kishit ndaj këtij personazhi?
Që kur regjisori Iber Deari filloi të shkruajë skenarin, ne ishim në kontakt të vazhdueshëm. Ai kishte menduar për mua për rolin e Destanit, duke e njohur karakterin dhe figurën time, prandaj nuk ishte e nevojshme të kaloja një audicion. Kur lexova skenarin për herë të parë, më pëlqeu shumë përshkrimi i personazhit si ‘bad guy’ por jo shumë i tipizuar, të cilin e interpretoj shumë natyrshëm.

Si përshkruan roli i Destanit karakterin dhe kontributin e tij në zhvillimin e ngjarjeve në film?
Destani është një djalë problematik, një servil që kryen çdo punë që i kërkon shefi i tij, Miftari. Ai ka interesa të tijat personale dhe momente kur tregon fuqinë fizike, por ka raste kur arrin të manipulojë situatat vetëm me fjalë.

Si u përgatitët fizikisht dhe emocionalisht për të interpretuar rolin e Destanit?
Përgatitja fizike ishte më e lehta, duke përfshirë ushtrime në fitnes për të forcuar trupin. Ndërsa, përgatitja emocionale ishte më sfiduese, teksa krijohej një karakter negativ që nuk duhej të binte shumë në sy. U përpoqa për të gjetur një mënyrë të natyrshme të të folurit dhe kostume që nuk ishin të tepruara.

A keni hasur ndonjë sfidë specifike gjatë interpretimit të këtij personazhi?
Çdo rol sjell sfidat e veta, këtu përfshirë disa skena të vështira ku performanca duhej të ishte e saktë në dialogje të gjata pa ndërprerje të kamerës, pavarësisht lodhjes fizike.

Si ka qenë bashkëpunimi juaj me regjisorin dhe me të tjerët në set gjatë xhirimeve?
Regjisori, i cili është edhe mik i mirë, na ka trajtuar me respekt dhe profesionalizëm. Ka qenë një përvojë shumë pozitive; ai ishte shumë i qartë për atë që priste nga roli im dhe ofroi shumë udhëzime dhe sugjerime.

A ka ndonjë skenë ose moment të veçantë në film që ju ka lënë përshtypje të thellë?
Disa momente të aksionit ishin të veçanta, veçanërisht një skenë ku pata një përplasje fizike me aktorin kryesor, e cila ishte aksidentale por shtoi autenticitetin e skenës.

Çfarë lloj përvoje mbani nga ky projekt dhe çfarë do të mbani mend më së shumti nga ky bashkëpunim?
Ky projekt ishte një përvojë mbresëlënëse, ku punova me një ekip të madh dhe të respektuar. E vlerësoj energjinë dhe dinamikën që regjisori mbajti në set, duke krijuar hapësirë për diskutime dhe ndarje mendimesh.

Si ka ndikuar ky rol në zhvillimin tuaj si aktor? A ka sjellë ndonjë sfidë të re që do të përmirësonte aftësitë tuaja aktoriale?
Çdo projekt më ndihmon të rritem në profesionin tim. Ky film në veçanti më ka hapur horizonte të reja dhe më ka mësuar rëndësinë e analizës së personazhit dhe rëndësinë e bashkëpunimit me kolegët dhe regjisorin.

Cili është mesazhi ose ndjenja që dëshironi të lini te shikuesit pasi ta shohin filmin “Everybody Calls Redjo” dhe pasi të njohin rolin tuaj, Destan?
Shpresoj që shikuesit të përjetojnë një gamë të gjerë emocionesh nga qeshja te lotët. Mesazhi që dëshiroj të përçoj përmes Destanit është se veprimet negative rrallëherë sjellin fund të mirë dhe se personazhi simbolizon rrugët që nuk duhen ndjekur.